RL 1-017 կանոններում կատարված փոփոխությունների գրանցում 22.08.2011 Կենտրոնական բանկի կողմից 2011թ. օգոստոսի 22-ին գրանցվել են «Հայաստանի ավտոապահովագրողների բյուրո» ԻԱՄ խորհրդի կողմից հաստատված «ԱՊՊԱ ոլորտում ապահովագրական ընկերությունների կողմից ապահովագրական հատուցումների վճարման» RL 1-017 կանոններում կատարված փոփոխությունները:

Կանոններում կատարվել են հետևյալ հիմնական փոփոխությունները.
 
• սահմանվել է, որ յուրաքանչյուր տեսակի վնասի գծով (գույքին պատճառված վնասներ, առողջությանը պատճառված վնասներ, կորցրած եկամուտ, հուղարկավորության հետ կապված ծախսեր, կերակրողին կորցրած անձի կրած վնասներ) ապահովագրական հատուցման հետ կապված գործընթացներն իրականացվում և որոշումները կայացվում են միմյանցից առանձին.
• սահմանվել է, որ ապահովագրական պատահարում ներգրավված որևէ ապահովագրական ընկերության կողմից կրկնակի փորձաքննություն նշանակված լինելու դեպքում վերջինի արդյունքները պարտադիր են նաև տվյալ պատահարում ներգրավված մյուս ապահովագրական ընկերությունների համար.
• սահմանվել է, որ ապահովագրական ընկերությունը չի մերժում վնաս պատճառողից վնասների հատուցում ստացած տուժողին ապահովագրական հատուցման վճարումը, եթե դա ստացվել է հետագայում վերադարձվելու պայմանով.
• սահմանվել է ապահովագրական ընկերությունների պարտականությունը 5 տարի ժամկետով պատշաճ պահպանելու և արխիվացնելու հատուցումների գործընթացում ստացված և տրամադրված փաստաթղթերը և հեռախոսազանգերի ձայնագրությունները.
• ներդրվել է ԱՊՊԱ ոլորտում վնասված գույքի փորձաքննության համար զննության համակարգը, որի էությունն այն է, որ տուժողի պահանջով ապահովագրական ընկերությունը նախքան պատահարի գծով բոլոր փաստաթղթերի ստացումը իրականացնում է վնասված գույքի զննություն, կազմում զննության ակտ, որը բոլոր շահագրգիռ կողմերի կողմից ստորագրվելուց հետո թույլատրում է իրականացնել վնասված գույքի վերանորոգում: Ընդ որում համակարգի արդունավետ կիրառումը ապահովելու նպատակով ապահովագրական Ընկերության նկատմամբ սահմանվել է պարտավորություն գույքին պատճառված վնասների հատուցում ստանալու համար դիմում ներկայացրած անձին գրավոր ծանուցել գույքի փորձաքննության համար զննություն իրականացնելու պայմանների, ժամկետների և մերժման հիմքերի մասին:
• պահանջ է սահմանվել, որպեսզի ընկերությունները իրենց ներկայացվող հատուցման դիմումների ձևերում ներառեն դրույթ` ապահովագրական կեղծիքների պատժելիության վերաբերյալ դիմում ներկայացնողի տեղեկացվածության մասին.
• պահանջներ են սահմանվել կանխավճարային համակարգի կիրառման ժամանակ ներկայացվող փաստաթղթերի նկատմամբ, ինչպես նաև հստակեցվել են տուժողի առողջությանը պատճառված վնասի գծով առանձին տեսակի ծախսերի (ամբուլատոր-առաջնային բուժօգնության, հիվանդանոցային բուժօգնության և բուժման շարունակականության (ամբուլատոր-ռեաբիլիտացիոն բուժման) ապահովմանն ուղղված միջոցառումների հետ կապված) հատուցման համար պահանջվող փաստաթղթերին ներկայացվող պահանջները.
• հստակեցվել է տուժողի աշխատունակության կորստի աստիճանը որոշելու կարգը այն դեպքերի համար, երբ դա չի իրականացվում բժշկասոցիալական փորձաքննությամբ.
• սահմանվել է, որ այն դեպքերում, երբ վնաս պատճառելու պահին տուժողը չի աշխատել, և հնարավոր չէ որոշել տվյալ վայրում տվյալ որակավորմամբ աշխատողի վարձատրության սովորական չափը, կորցրած եկամտի հաշվարկի հիմքում դրվում է 32,500 ՀՀ դրամը:

Փոփոխություններն ուժի մեջ կմտնեն 2011թ. սեպտեմբերի 1-ին: Փոփոխությություններն ուժի մեջ մտնելուց հետո կանոնների փոփոխված տարբերակը կտեղադրվի կայքի «Իրավական ակտեր» բաժնում: