RL 1-031 կանոնների գրանցում 01.11.2013

Հայաստանի Հանրապետության կենտրոնական բանկի կողմից 2013 թ.-ի հոկտեմբերի 29-ին գրանցվել են Բյուրոյի խորհրդի կողմից հաստատված «ԱՊՊԱ ոլորտում ապահովագրական պատահարի հետևանքով տուժողի առողջությանը պատճառված վնասների գծով բժշկի ցուցումով բուժման շարունակականության (ամբուլատոր-ռեաբիլիտացիոն բուժման) ապահովմանն ուղղված միջոցառումների հետ կապված և այլ ծախսերի հատուցման ենթակա սահմանաչափերը և այդ ծախսերի անհրաժեշտության, հիմնավորվածության և փաստացի ապացուցվածության չափանիշների» RL 1-031 կանոնների փոփոխությունները և լրացումները:

RL 1-031 կանոններում մասնավորապես կատարվել են հետևյալ փոփոխությունները և լրացումները.

1. կոտրվածքները բաժանվել են երկու խմբի՝

• ողնաշարի, ազդրոսկրի, մեծ ոլոքի կոտրվածքներ, կոնքազդրային հոդի և ծնկահոդի ներհոդային կոտրվածքներ (ամբուլատոր-ռեաբիլիտացիոն բուժման առավելագույն ժամկետը՝ 6 ամիս),
• այլ կոտրվածքներ (ամբուլատոր-ռեաբիլիտացիոն բուժման առավելագույն ժամկետը՝ 4 ամիս),

2. ավելացվել է այրվածքների խումբը՝

• այրվածքներ առանց սպիացման և ֆունկցիայի խանգարման (ամբուլատոր-ռեաբիլիտացիոն բուժման առավելագույն ժամկետը՝ 2 ամիս),
• այլ այրվածքներ (ամբուլատոր-ռեաբիլիտացիոն բուժման առավելագույն ժամկետը՝ 12 ամիս):

RL 1-031 կանոններում կատարված փոփոխությունները և լրացումներն ուժի մեջ են մտնելու 2013 թվականի նոյեմբերի 11-ին: Փոփոխություններն ուժի մեջ մտնելուց հետո կանոնների ինկորպորացված տարբերակը կտեղադրվի կայքի «Իրավական ակտեր» բաժնում: